حياة جديدة !
السلام عليكم
ما أدري إذا لما الحين في ناس تمر تشوف البلوق والا لأ
آخر انتري كان قبل أكثر من سنة .. وصراحة كنت ناوي اسوي تجديد كامل للبلوق وأشغل الموقع اللي صممته قبل سنة بس تكيسلت احطه اون لاين
كنت متوقع إني إذا سافرت أمريكا راح يكون عندي وقت أجابل الموقع والبلوق
لكني اكتشفت اني ما عندي وقت أسوي شي غير الدراسة !!
...
حياتي تغيرت وايد خلال الشهرين اللي طافو
السكن : ساكن بروحي بشقة ، وما تعرفت على الجيران لما الحين لأني ما أصادفهم أصلا . الشقة حلوة وبمبنى يديد ونظيف حيل .. بس طبعا حرصت انها ما تكون مأثثة .. لأني أحب التأثيث مع إني ما أثثت ولا مرة بحياتي !!
الدراسة : نظام الدراسة مختلف شوي .. التركيز على القراءة .. يعني عادي جدا يطلب منا الدكتور نقرا 100 صفحة ونتجهز للمناقشة بالمحاضرة اللي بعدها !! والهومووركات تاخذلها مو أقل من ساعتين يوميا !! بس ميزة الدوام إنه 4 أيام بالاسبوع .. والميزة الأهم إن يوم اليمعة ما عندنا دوام .. وبالتالي الويك اند طويل وصلاة اليمعة تصير سهلة
الأكل : أول شهر كنت ما آكل إلا بحري أو بيتزا أو خضار .. أدري في فتاوى تجيز أكل اللحم بأمريكا .. بس أنا ما أرتاح أكل أكلهم لأني أدري إنهم ما يذبحون .. بس بعد ما استقريت طحت على سوبر ماركت يبيع منتجات حلال ومنتجات عربية وبديت أتعلم على الطباخ شوي شوي .. والحين عندي استعداد أسوي عزيمة كاملة من المقبلات إلى الحلو
=)
التنظيف : هذا الشي اللي ما كنت حاسب حسابه !! تنظيف الشقة والصحون والملابس .. خصوصا تنظيف الشقة وتحديدا تكرمون الحمام والمطبخ .. انا متعود بالكويت يتنظفون كل يوم .. فـ هني أنا أنظف مرتين بالاسبوع ومتضايق .. بس أقول حق أهلي الله يهني اللي بتتزوجني .. بريحها بتنظيف الشقة .. أصلا صرت أنظف أحسن من خدامتنا
=P
التصوير : وما أدراك ما التصوير !! الولاية حدها روووووووووعه وودي أصور كل شي .. بس صراحة ما عندي وقت .. كل اللي صورته واحد سعودي كان يدرس لغة وقبل لا يرجع السعودية قال لي صورني وصورته جم صورة .. هذي وحدة من الصور
بس ان شالله ناوي أطلع أصور هالويك اند .. إذا ما كان عندي لود هومووركات
-
-
-
صراحة ودي أكتب وايد مواضيع .. وعسى الله يقدرني أكتب خلال الأيام الياية .. بس هالبوست عشان أقول تراني رديت للكتابة بالبلوق .. واسمحولي ابدي بموضوع صغير حيل
-
-
- هل الترتيب للبنات بس ؟ -
لما الحين ما كملت تأثيث شقتي عدل .. بس خلصت الشغلات الأساسية كلها تقريبا .. وصورت الشقة جم صورة ودزيتها حق أهلي وربعي ، وكل ما دزيتها حق أحد يقول لي جنها شقة بنت !! لدرجة إن واحد من الشباب يقول لي ما أتوقع انت مختار الألوان .. أكيد اختك مختارتلك !!
ليش الشباب طايحين من عينكم جذي ؟ ترى أحسن مصممين الديكور بالعالم : ذكور !! وأحسن مصممين الجرافيك : ذكور !! وأشهر الرسامين : ذكور !! يعني الوظايف اللي فيها اهتمام بالديكور والألوان يتميزون فيها الذكور على الإناث .. فـ ليش لما ولد يرتب غرفته ويحط فيها ألوان حيوية تفتح النفس يقولون له شغل بنات ؟
صراحة .. أنا فيني هالعرج بعد =/ لما ييت أأثث غرفتي حطيت ألوان وحركات بنات على قولتهم .. بس لما ييت أأثث الصالة سويتها ثقيلة .. لأني نفس معظم الناس .. أحس إن الألوان ما تعكس روح "ذكورية" والصالة بيشوفونها الناس فـ بالتالي لازم تكون ألوانها ثقيلة ورسمية
بخليكم مع الصور عشان تحكمون .. وألقاكم إن شالله قريب مع خواطر مغترب
=)
Comments
وووو أخيرا رديييت :)
شووف ماالك شغل ابحجي الناس، ترا الالوان والستايل اللي نقيته مودرن وحييل قوي!!
جود تو هاف يو باك برو
يالله ناطرين الصور ...
Posted by: ahmad.TV | September 25, 2007 12:47 PM
i check ur blog from time 2 time
:)
yalla waiting for ur new post
Posted by: al-zain | September 29, 2007 08:39 PM
مخرجنا ::
تسلم حبيبي عالرد .. وان شالله أخلص امتحاناتي واطلع أصور .. خصوصا هالأيام ألوان الخريف بدت تطلع وتعطي جو مو صج
تحياتي (f)
al-zain ::
أنا ما أدري شلون تطيحون على بلوقي :p
تسلمين عالكومنت .. وهذا البوست اليديد نزلناه
..:: خالد ::..
Posted by: ka4 | October 1, 2007 07:52 AM
فنّان، تبارك الرحمن :)
لا أرى فيه شيئا أنثويا سوى الفراشات، أما الباقي فراق ٍ جدا و"يشرح القلب"
Posted by: Catism | October 14, 2007 10:32 PM
مساء الخير ...
الصراحه تاثيثك ما شاء الله عليه ربي يحفظك لاهلك يارب وفعلا ناعم ومرتب ونازك والصراحه الترتيب مو شرط للاناث بس بما انه البنت غالبا اهي اللي تكون ملكه بيتها ومهمه الترتيب والتنظيف عليها فالناس تربط سالفه الترتيب للبنات ...
دمت بود..
ننتظر الصور ...
Posted by: miss_lavendar | October 21, 2007 08:12 AM
Catism ::
هل الفراشات خلقت للإناث فقط ؟
سأطالب بحق الذكور في التمتع بمشاهدة الطبيعة وخصوصا الفراشات :p
شكرا للمرور والتعليق =)
miss_lavendar ::
ويحفظج لاهلج وأحبابج
والصور تحتاج تعديل .. ان شالله اشوف لي وقت أعدلهم اليومين اليايين وانزلهم
شكرا للمرور والتعليق =)
..:: خالد ::..
Posted by: ka4 | October 22, 2007 10:10 PM
يؤ
شو اكيييد اختك مختارتلك =p
لا والله استاذ خالد ... .
وربي رااايق
و راقي بنفس الوقت
بسم الله ماشاء الله تبارك الله ... .
الله يهنيك و يسعدك ويحقق مناك
وين البنوتة في الموضوع ... لما قريت البلوق اتوقعت اشوف انواع اللون البينك
ولا الفوشيا
اسمحلي
رااائع
Posted by: 6argoo3a | October 24, 2007 12:14 PM
ما أقول أخوي إلا ... الله يوفقك في دراستك في أمريكا ..
أعجبتني كتاباتك .. شبابية وواقعية !!! عموماً ... أضفت الصفحة في المفضلة Favorites وإن شاء الله أشوفها كل فترة ...
تحياتي لك ...
أخوك منصور ...
روسيا / بطرس بيرغ
Posted by: منصور | October 29, 2007 03:07 PM
6argoo3a ::
تسلم اخوي .. هذا من ذوقك =)
استعمال الألوان الفرايحية عموما ارتبط بالأطفال والبنات .. وعلى فكرة في دراسة على البنات تقول ان البنات ما يفضلون البينك على الالوان الثانية .. لكن لأن الأولاد ما يفضلونه .. فارتبط بالبنات
شكرا لك عالمرور العطر (f)
منصور ::
أجمعين يا رب ..
وهذا من ذوقك يا منصور =)
شكرا عالمرور .. (f)
..:: خالد ::..
Posted by: ka4 | October 31, 2007 10:16 PM
حتة آنة ضفتك بالمفضلة عندي =)
واذا عالغرفة حشة مو بناتية ... ههههههه بس ضحكت يوم جفت غرفة إرقادك
ماقط مر علي صبي يحب هالألوان الفرايحية
لووووول
بس الحلوو فيها انها تعكس شخصيتك وروحك الحلوة
....
ماطول عليك
بس اليوم توني طحت على بلوقكك بعد مانزلت نوتات التصوير
انشالله أتعلمه جريب
وأخيراً
أحب أقولك انك من الاشخاص اللي نحب نقرى مواضيعهم لأنها ترد الروح
من أحس بضيق أفتح هالبلوقات الطيبة اللي تحوي فيها معاني حلوة وتونس وتفيد بنفس الوقت
وعندك بلوق إستكانة خووش بلوق بعد
ماوقل غير كثر الله خيركم وأدامه علينا
ونصيحة من الــقلب
لاتقطعوون كتابتاكم كلنا ناطرينها
Posted by: SMile | November 12, 2007 10:49 AM
SMile ::
ما أدري إذا كنتـ ي ولد أو بنت
أنا بفترض انج بنت .. وإذا كنت غلطان صلح لي =/
..
كنت زاير صاحبي الويك اند اللي طاف
لما دخلت شقته قلت له هذي شقة واحد عزابي صح .. توني أحس بمعنى العزوبية بالغربة =D
حسيت ان شقتي مرتبة زيادة عن اللزوم =/
..
مشكورة على ردج .. وهذا من ذوقج والله
وأتمنى اسمع ملاحظاتج على مذكرات التصوير .. لأني ناوي اكتب وحدة يديدة خلال اجازة نص السنة
وصراحة ما اقرى بلوقات وايد .. بس أذكر اني مريت على بلوق استكانه اكثر من مرة .. وشهادتج لها تدل انها مميزة =)
شكرا عالتعليق مرة ثانية .. واذا كنت ولد اتمنى تحول الكلام بصيغة المذكر بدون زعل ^_^"
..:: خاالد ::..
Posted by: ka4 | November 12, 2007 10:37 PM
لووووووول .. لا والله الفرضية بمحلها
وانشالله أوافيك بالاقتراحات أول ماخصل امتحاناتي =)
زين عندي سؤال جذي مادري يسمونه استفسار
لو بغينا ناخذ دورة في التصوير.. من عندكم في الكويت يمدحونه؟
اذا تسمح تعطيني جم اسم أو أسامي مؤسسات تعطي مثل هالدورات
بصراحة ودنا نسوي سفرة تدريبية للطلبة عندنا والعين يا عالكويت أو قطر
وكانت من ضمن الاقتراحات دورة التصوير
Posted by: SMile | November 13, 2007 02:34 AM
SMile ::
الله يوفقج بامتحاناتج ويسهل عليج =)
بالنسبة للمؤسسات اللي تعطي دورات بالكويت فـ هي وايد .. لكن أبرزها :
بيت لوذان
النادي العلمي
مركز العمل التطوعي
جامعة الكويت - مركز خدمة المجتمع
وبعض المدربين ممكن يتفقون معاكم ويقدمون لكم دورة مثل ما تحبون وبالوقت اللي تفضلونه
وتتشرف فيكم الكويت =)
..:: خالد ::..
Posted by: ka4 | November 14, 2007 06:33 PM