خالد بلا رتوش !!!

حرصت ان احضر هذا المنتقى ودورتك بالاخص .. كوني أحب الفنون الجميلة .. وظنا مني انني سأرى وجها اخر من شخصية خالد الا وهي شخصية المحاضر ..

على الرغم من انه قدم العديد من الدورات الا انني لم احضر اي منها .. انما سبق و أن رأيت خالد الانسان , الزميل في العمل , الصديق الوفي والأخ النصوح .. بحكم عملنا معا في نفس القطاع سابقا ..

ولكن سرعان ما تلاشت هذه الافكار من مخيلتي بعد صعوده على المنصه فإن من رأيت هو خالد بلا رتوش !
خالد الانسان الطبيعي البسيط الذي يحرص على استفادة الناس مما يقدم قبل كل شيء
ابدعت والهمتنا يا خالد
شرح وافي ومبسط واسلوب جميل وجديد في الطرح جعلنا نطلق عقولنا وابصارنا لتبحر معك في عالم التصوير وتجول اقسامه بفترة قياسية خيالية لننهل من ينابيع الجمال الكثير ..
في اقل من ساعتين .. خاطبت المبتدئ والمتوسط والمحترف .. شرحت وتعمقت بأطيب ما يمكن للنفس ان تكون
هذا هو خالد .. في الواقع ,في التلفاز وعلى المنصه !!
يبقى للتواضع والابداع عنوان هو انت
في البداية تخوفت من الوقت الضيق ولكنني اعلم مدى عشقك لهذه الهواية واستعدادك للعمل بكل ماأوتيت من مجهود لتعم الفائدة للجميع وتوصل لهم اكبر قدر من المعلومات ..
وحرصك الشديد في ان يكون الاسلوب سلس وبسيط وهذا ما يميزك عن باقي المحاضرين ..
مواقف كثيرة تدل على روحك الطيبة ومن حضر هذا المنتقى حتما استشفها !!
سامحني ان كنت اطلت .. واعذر كلماتي عن التقصير
خلصنا فقرة الفصحى :P
يعطيك الف عافية يا خالد ووفقك الله لفعل الخير
وما من قصور بالعكس كفيت ووفيت فوق المتوقع :)
بس اهم شي :
"فاااضيييييييييي ليييييييييييش" :D !!
لوول احد يعرف سالفة فاضيي ليش ؟؟
:)

هي دقائق قليلة قضيتها في ورشتكم ، لكنها عوضتني عن ساعات كثيرة ..
كنت أملك القليل في عالم التصوير .. لكن اختلف الأمر حالياً ..
إضافة إلى ذلك .. الآن توجد لدي دوافع لتعلم المزيد ..
لتسليمك لنا مفاتيح هذا العالم الجميل ..

و شكراً لتبسيطك لنا لهذا العالم ..
حيث استخدامك مصطلحات قريبة للمتلقي .. وسهله عليه ..
و بالنسبة لإلقاءك .. كان مشوّق .. ومفيد ..

لكن .. هلا أطلعتنا على مسيرة نجاحك .. ؟
و كيف كانت البداية ؟
كوني شغوفة في قراءة قصص الشخصيات الناجحة ..
و أنت أحدهم .. و إن شاء الله .. يدوم الحال .. ويتقدم دائماً ..

يعطيك العافية خالد ..
لا آنا ولا أخوي رحنا .. الحبيب فرّ حولي 3 ساعات ورد لي "وين صاير هذا؟" .. أفف!
عموما ً هو معاي توه ماخذ ليسن وإثنينّا ما ندل الكويت ..
إذا فيه أي محاضرة ثانية (إذا) أروح ..
لأني ترا مو خبيرة بالتصوير مثلكم ، آنا أصوّر وبس وناوية أطلع منها كـ هواية وأدخل الإحتراف ..
موفق خالد ..

Manooya ::

جنج شوي بالغتي .. مو شوي .. وااااااايد بالغتي

وأنا كنت أصغر المحاضرين وأقلهم خبرة .. ولولا ان الموضوع حلو جان أنا متأكد إن محد بيقعد يسمعني


"فاااضيييييييييي ليييييييييييش"

تتطنزين ؟

صراحة ما قلتها إلا من القهر لما أشوف صورة شخصية كلها فراغ .. اسمها صورة شخصية .. ليش أخلي الشخص نتفة بالصورة ؟

وشكرا للحضور والرد =)



Yanni ::

أما مسيرة النجاح .. فهذه بالتأكيد ليست عندي =/

لا يغرك وجودي فوق المنصة .. فأنا لا امتلك سوى بعض المعلومات التي قدمتها لكم .. أما تجربة ( شخصية ناجحة ) .. فلا أظنها لدي

كل ما لدي ذكرته في مقدمة الندوة أو الورشة

قراءة وتجارب واحتكاك بالمصورين .. هذا كل ما لدي


وشكرا لحضورك وردك =)



Evans ::

الله يعافيج

يدور 3 ساعات @_@ ؟

انزين ليش ما يسأل .. ما ضاع من سأل =)

عالعموم .. نشكر له مجرد اهتمامه ومحاولته ان يوصل ..

وبعدين شالكلام اللي تقولينه .. يحتاي أحط صورج اللي في سبوت عشان نخلي الناس تحكم منو الخبير ؟

"خصوصا صورة الجسر اللي في فنلندا وصورة الآيس كريم .. لما الحين ضاربين بمخي"


وللقمة يا صاحبة الهمة =)





كنت أتوقع أسمع ملاحظات مباشرة من اللي حضروا .. ترى النقد يطور الإنسان =)




..:: خالد ::..

أنا ما ابالغ يا متواضع =)

لووول ادري مبين انك كنت منقهر "حدك" !!

بس طلعت بعفوية تضحك =)

انت انسان مثابر ومنتج منذ نعومة اظافرك بس تخاف من العين ادري فيك :P

شنو فايدة مادة دسمة مفيدة بدون محاظر عنده اسلوب حلو ويتكلم بعفويته وفوق هذا خبرة صنعها بنفسه وثابر عشانها :)

الشهادات مو كل شي يا خالد :)
خبرتك تساوي مليون شهادة
احييك من كل قلبي

لا طبعا ً ، أخوي يفتر 3 ساعات عشاني ؟
NO WAY
تلقاه من صج ما دل ، لف شوي شوي وما دل ،
وراح مجمع الرحاب يشتري له كم فلم أو لعبة ..
أعرفه زين !
\\
آنا مصرة ، آنا مو محترررررفة والله ..
أصلا ً المذكرة اللي قلت بسويها ممكن يتفاجأ البعض منها ،
لأني آنا مو حرّيفة ، ولا أعرف أصول التصوير ،
آنا أصور كل شي يعجبني بخبرة بسيطة بسرعة الغالق وهالأشياء ..
ومذكرتك زادت من خبرتي القليلة لأنه الأفلام وسوالفها كلش ما أعرفها ،
ومحد كان يعلمني معنى الـ"آي إس أو" وآنا تعلمته من خرابيطي ..
يعني كلها تجارب ، ومذكرتي بتكون تجربتي مع التصوير مو مذكرة شاملة تفيد الجميع مثلك ..
يمكن تشنص معاي مرة مرتين ثلاث ، لكن آنا أظل مصرة إني لا أزال هاوية ..
الشي اللي يخلي الصور حلوة إني دايما ً أطلع ، أسافر أي مكان بالعالم بس عشان أصور ..
ولأنه كاميرتي معاي 24 ساعة ما تفارقني ..
ما أنقد أعمالي ، بالعكس فخورة ، لكن رحم الله إمرىء عرف قدر نفسه ..
وبس خلصت -..-

كانت المحاظره خفيفه ومفيده.. استمتعت فيها لابعد الحدود

عرفت فيها معلومات ماكنت اعرفها من قبل

الله يعطيك العافيه اخوي

i don't know why fine art students are the last to know about anything related to their feild ...

Manooya ::


حتى لو بنتكلم عن الخبرة .. أنا أقلهم خبرة =)

عالعموم شكرا للمتابعة (f)

ومبروك البلوق ;)

Evans ::

ما قلنا محترفة .. قلنا خبيرة =)

الخبرة تيي من التجارب .. وانتي تجاربج ماشالله .. ما يحتاي أقول ..

وبانتظار المذكرة ;)




NESCAFE ::

لو كنت شايف الفلكر مالج قبل المحاضرة ودريت انج موجودة جان ما رضيت أصعد المنصة =/

ماشالله تبارك الله .. شي خيالي والله

أنا دايما في دوراتي أخصص يوم حق التصوير داخل البيت .. وشلون نقدر نصور شغلات حلوة بدون ما نطلع من الغرفة

ومن احلى التطبيقات اللي شفتها وبدون مجاملة : تطبيقاتج .. خصوصا كوليكشن كلرز

شي راقي جدا .. أهنيج عليه =)

وإذا تسمحين لي : ودي أستخدمه كمثال في الدورات الياية .. أقول للمتدربين هذا شغل مصورة كويتية شابة .. عشان ما يستصعبون المسألة =)

وشكرا عالحضور والرد نسكافيه ..



** جراح مو غريب كلش =/






ray ::

تسئليني أنا =/ ؟

المفروض إدارة قسمكم يحطون لوحة إعلانات فيها كل الأنشطة اللي صايرة بالكويت

ray وشكرا عالمرور والرد

** زرت بلوقج عالسريع .. من الأسلوب أظن كنا نكتب في منتدى واحد قبل .. صح =) ؟







..:: خالد ::..

شكراً .. لكني لازلت في بداية الطريق

يمكن لاحظت بمجموعة الصور اللي عندي ان اغلبها داخليه .. والسبب اهوا اني انحرج اصور بمكان عام
وخاصة بالكويت، الكل يعلق ويتكلم.. فـ لي صور خارجية قليلة جداً

بالنسبة للدورات شلون نعرف اذا لك دورات بتسويها؟

طبعاً اسمح باستخدامك للصور كمثال.. ويسعدني هالشي

اخي الكريم بما انك محترف وخبير بالتصوير تبارك الرحمن.. والقيت نظره على الفلكر مالي
انا اتمنى اني امتلك كاميرة SLR
غير الكومباكت اللي عندي .. فـ بشنو تنصحني ؟

وهل موضوع العدسات سهل.. لان الشي هاذا مسبب لي أزمه نوعاً ما :")
ماادري على اي اساس المصوّر يحدد استخدامه لعدسه معينه

بالنسبة لـ جراح .. يمكن تعرفونه مشالله الكويت صغيره :>

عذراً على الاطالة

NESCAFE ::

اللي بيده كاميرا بمكان عام الناس تطالعه جنه بيده مسدس !

فعلا صعب التصوير بالأماكن العامة بالكويت .. وعالبنت أصعب وأصعب ..


بالنسبة للدورات : أنا ما عندي جهة معينة أشتغل معاها ، ولذلك دوراتي كلها تصير بترتيب من جهات معينة .. يتصلون علي يقولون نبيك تسويلنا دورة مدتها كذا يوم وعدد المتدربين هالكثر .. بالتاريخ الفلاني .. وبالمكان الفلاني .. وأنا مجرد إني أروح ألقي الدورة وأمشي =)

يعني كل الترتيبات الإدارية والتسجيل وهالسوالف ما أدري عنها

لذلك .. دايما لما يقولون لي نبي نسجل عندك بدوراتك أقول لهم ما عندي دورات .. انتو رتبو وقولولي =)



أنا طبعا ما صدقت خبر واستخدمت صورج في آخر يوم من دورة حق نادي صيفي أمس .. وتكلمت عن شلون الواحد ممكن يبدع بدون لا يطلع من غرفته .. وكانت الامثلة بتوقيع نسكافيه =)




بالنسبة للكاميرا الأس ال ار .. نصيحتي شوفي اللي حوالينج شنو اللي عندهم ؟ هل عندهم كانون او نيكون ؟ واخذي نفسهم .. مو شرط نفس الموديل .. بس نفس الماركة

ليش ؟
لأن في هالحالة تقدرين تبادلين عدسات واكسسوارات معاهم .. وممكن تتفقون بحيث كل وحدة تشتري عدسة وتصير عندكم مجموعة كاملة ..

لو كنتي بتاخذين كانون .. بنصحج تاخذين 350 دي وعدسة 28-135مم بحيث تغطي مساحة حلوة للتصوير اليومي .. وعندج العدسة اللي تيي مع الكاميرا 18-55مم ممتازة كـ وايد انجل .. وتاخذين لج عدسة 50مم وسعرها بحدود 30 دينار بس .. وهذي ممتازة للتصوير اللي نفس تصويرج .. وتنفع لتصوير الأشخاص =)


سجلي في منتدى أصدقاء الضوء .. راح يطلع لج منتدى خاص للي مسجلين اسمه دروس اصدقاء الضوء .. ممتاز جدا للتعليم .. أو شوفي موقع عرب ديجي كام .. هم ممكن يساعدج وايد

www.friendsoflight.com
www.adigicam.com



..:: خالد ::..

شكراً اخوي ويعطيك العافيه

yep, that's right

it was a long time ago.